Հայերեն   English
 
   12.12.2016

Заявление

     Вчера, 9 декабря, азербайджанское новостное агенство APA распространило заявление уполномоченного по правам человека Азербайджана, по поводу двух граждан Азербайджана, осужденных по законодательству Республики Арцах и отбывающих наказание в Республике Арцах. В частности, по утверждению омбудсмена Азербайджана руководитель Международного Комитета Красного Креста(МККК) в беседе с ней отметил, что данные личности "осужденные незаконным судом не соответствующим международным нормам права и противоречащие им". (http://m.apa.az/…/ombudsmen-vopros-dilgama-askerova-i-shakh…). 
     Очевидно, что заявление омбудсмена Азербайджана - это пример крайне неудачного сотрудничества института национального защитника прав человека и МККК. Более того, подобные заявления недостойны любого омбудсмена. Данное заявление вызвало необходимость соответствующего комментария со стороны МККК, т. к. оно, в первую очередь, вредит общественному восприятию МККК, как исключительной международной организации, руководствующейся абсолютными принципами беспристрастности и нейтральности. 
     В то же время, призываю компетентные государственные органы Республики Арцах не предопределять дальнейшие отношения с офисом МККК в Степанакерте заявлением омбудсмена Азербайджана и его последствиями, учитывая исключительную гуманитарную миссию Международного Комитета Красного Креста
   12.12.2016

Լավագույն շարադրությունների հեղինակները պարգևատրվեցին

     Դեկտեմբերի 10-ին Ստեփանակերտի երաժշտական ուսումնարանի դահլիճում տեղի է ունեցել Արցախի մարդու իրավունքների պաշտպանի հայտարարած` Մարդու իրավունքների միջազգային օրվան նվիրված դպրոցական շարադրությունների մրցույթի մրցանակաբաշխության արարողությունը: Միջոցառմանը ներկա էին մրցութային հանձնաժողովի նախագահը և մի քանի անդամներ, հատուկ մրցանակներ սահմանած կառույցների ներկայացուցիչներ, Արցախի քաղաքացիական հասարակության ներկայացուցիչներ, մրցույթի գործընկեր TSD Inc. ընկերության ներկայացուցիչը: 
     Ողջույնի խոսքով հանդես եկան ԼՂՀ մարդու իրավունքների առաջին պաշտպան Յուրի Հայրապետյանը, ԼՂՀ կրթության, գիտության և սպորտի նախարար Սլավա Ասրյանը, ԼՂՀ մշակույթի և երիտասարդության հարցերի նախարարի տեղակալ Գայանե Գրիգորյանը: 
     Առաջին մրցանակային տեղը զբաղեցրել է Ստեփանակերտի համար 8 ավագ դպրոցի 12-րդ դասարանի աշակերտուհի Հելեն Ասրյանը: Երկրորդ մրցանակային տեղը զբաղեցրել է Ասկերանի շրջանի Սզնեք գյուղի միջնակարգ դպրոցի 11-րդ դասարանի աշակերտուհի Գայանե Մարտիրոսյանը, իսկ երրորդ մրցանակային տեղը` Ստեփանակերտի համար 1 հիմնական դպրոցի 8-րդ դասարանի աշակերտուհի Անի Գևորգյանը: Առաջին մրցանակային տեղը զբաղեցրած մասնակիցը պարգևատրվել է ArmTab պլանշետով և ArmPhone բջջայինով, երկրորդ մրցանակային տեղը զբաղեցրած մասնակիցը՝ ArmTab պլանշետով, իսկ երրորդ տեղը զբաղեցրածը՝ ArmPhone բջջայինով: 
     Բացի այդ, մրցույթի եզրափակիչ փուլ անցած, սակայն մրցանակային տեղեր չզբաղեցրած ինը մասնակիցները արժանացել են հատուկ մրցանակների, որոնք սահմանել են հայկական երկու պետությունների խորհրդարանները, ՀՀ մարդու իրավունքների պաշտպանը, ԼՂՀ կրթության, գիտության և սպորտի նախարարությունը, ԼՂՀ մշակույթի և երիտասարդության հարցերի նախարարությունը, ԵՊՀ իրավագիտության ֆակուլտետը, ԼՂՀ մարդու իրավունքների առաջին պաշտպանը, ՀՀ ԱԺ պատգամավոր Շուշան Պետրոսյանը, և ԼՂՀ արհմիությունների ֆեդերացիան: Մրցույթի գործընկեր TSD Inc. ընկերությունն ArmPhone բջջայինով պարգևատրել է եզրափակչի ևս մեկ մասնակցի` Մարտակերտի շրջանի Վաղուհաս գյուղի միջնակարգ դպրոցի 10-րդ դասարանի աշակերտ Մարատ Հայրապետյանին: 
     Իր խոսքում Արցախի մարդու իրավունքների պաշտպանը շնորհակալություն է հայտնել հանձնաժողովի անդամներին, հատուկ մրցանակներ սահմանած կառույցներին, մրցույթի գործընկեր TSD Inc. ընկերությանը, ինչպես նաև մրցույթի բոլոր մասնակիցներին: Ռուբեն Մելիքյանն ընդգծել է, որ շարադրությունների մրցույթը հասել է իր նպատակին, քանի որ մեր դպրոցականներին առիթ է տվել մտածելու մարդու իրավունքների դերի, դրանց կարևորության մասին: Մարդու իրավունքների պաշտպանը պատրաստակամություն է հայտնել մրցույթը դարձնել ամենամյա, իսկ եզրափակչի մասնակիցների համար կազմակերպել ուսումնական այց Հայաստանի Հանրապետություն` ուղղված մարդու իրավունքների ոլորտում գործառնող կառույցների հետ շփումների հաստատմանը, ինչպես նաև իրավունքի ոլորտում գիտելիքների ընդլայնմանը: 
     Հիշեցնենք, որ մարդու իրավունքների միջազգային օրվան նվիրված դպրոցական շարադրությունների մրցույթը հայտարարվել էր սեպտեմբերի 1-ին: Ձևավորվել էր մրցութային հանձնաժողով` Արցախի, Հայաստանի և Սփյուռքի 18 հանրային գործիչների ներգրավմամբ: Մրցութային հանձնաժողովի նախագահն էր Արցախի մարդու իրավունքների առաջին պաշտպան Յուրի Հայրապետյանը: 

Արցախի մարդու իրավունքների պաշտպանի աշխատակազմ
   05.12.2016

Մամուլի հաղորդագրություն

    


 Սույն թվականի ապրիլին Ադրբեջանի սանձազերծած պատերազմական գործողությունների առաջին իսկ օրը Արցախի մարդու իրավունքների պաշտպանի հաստատությունը հանձնառություն է ստանձնել միջազգային իրավապաշտպան հանրությանը ներկայացնել Ադրբեջանական զինված ուժերի կողմից թույլ տրված դաժանությունների և միջազգային իրավունքի կոպիտ խախտումների փաստերը: 
     ԼՂՀ մարդու իրավունքների առաջին պաշտպան Յուրի Հայրապետյանն ապրիլի 21-ին հրապարակել է ադրբեջանական դաժանությունների վերաբերյալ նախնական հանրային զեկույց: Զեկույցը վերաբերում է ադրբեջանական ագրեսիայի հետևանքով մարդու իրավունքների բազմաթիվ խախտումներին, այդ թվում՝ գլխատումների, խոշտանգումների, զինծառայողների և քաղաքացիական անձանց մարմինների անարգման փաստերին, ինչպես նաև քաղաքացիական օբյեկտների հրետակոծությանը: Զեկույցը մշակվել է բաց աղբյուրների հիման վրա (մամուլ, սոցիալական ցանցեր և այլն): 
     ԼՂՀ մարդու իրավունքների երկրորդ պաշտպան Ռուբեն Մելիքյանը ԼՂՀ Ազգային ժողովի առջև հրապարակավ հանձնառել է իրականացնել փաստահավաք առաքելություն` նպատակ ունենանալով մշակել ապրիլյան պատերազմի հետևանքով Ադրբեջանական զինված ուժերի կողմից թույլ տրված մարդու իրավունքների խախտումների վերաբերյալ վերջնական զեկույց: Փաստահաված առաքելությունը նախաձեռնվել է ԼՂՀ մարդու իրավունքների պաշտպանի 2016թ. մայիսի 11-ի որոշմամբ՝ «Մարդու իրավունքների պաշտպանի մասին» ԼՂՀ օրենքի հոդված 11-րդ հոդվածի 4-րդ մասի հիման վրա: 
     Դեռևս շարունակվող փաստահավաք առաքելության ընթացքում արդեն իսկ կատարվել են բազմաթիվ այցեր, ականատեսների հետ տասնյակ հարցազրույցներ, ռազմական, բժշկական և տեխնիկական մասնագետների հետ խորհրդակցություններ, ինչպես նաև ԼՂՀ պետական մարմիններից տեղեկատվության տրամադրման մասին հարցումներ և բաց աղբյուրների մշտադիտարկում: 
     Փաստահավաք առաքելության ընթացքում անհրաժեշտություն է առաջացել առանձին զեկույցովանդրադառնալ մարդու իրավունքների երաշխավորման տեսանկյունից հատուկ կարևորություն ունեցող հարցի, այն է` Ադրբեջանական զինված ուժերի վարքագիծը իրենց հսկողության ներքո հայտնվածների նկատմամբ: 
     Ադրբեջանական զինված ուժերի կարճաժամկետ կամ երկարաժամկետ հսկողություն են ունեցել ընդհանուր թվով 31 անձանց կամ նրանց մարմինների նկատմամբ (այդ թվում` 3 քաղաքացիական անձ)` երեք աշխարհագրական ուղղություններով յոթ առանձին միջադեպերի հետևանքով: Ադրբեջանի հսկողության ներքո հայտնվածների շուրջ 90%-ը ենթարկվել են պատերազմական հանցանքների. նրանք խոշտանգվել են, պատժվել են մահվան, կամ նրանց մարմիններն անարգվել են: Այդ հանցանքները կրել են համակարգված և կազմակերպված բնույթ, քանի որ կատարվել են բոլոր երեք աշխարհագրական ուղղություններով` ապրիլի 2-ին Արցախի կողմի անձանց նկատմամբ հսկողություն հաստատած բոլոր ադրբեջանական զինվորական ստորաբաժանումների կողմից: 
     Արցախի Հանրապետության մարդու իրավունքների պաշտպանի նոր հանրային զեկույցը հրապարակվելու է ս/թ դեկտեմբերի 9-ին: Նույն օրը Ռուբեն Մելիքյանը հանդես կգա մամուլի ասուլիսով: 

ԼՂՀ մարդու իրավունքների պաշտպանի աշխատակազմ
   23.09.2016

  

   Արցախի դպրոցականների շրջանում մարդու իրավունքների վերաբերյալ գիտելիքների ընդլայնման, դրանց նկատմամբ հարգանքի մշակույթի խթանման նպատակով ԼՂՀ մարդու իրավունքների պաշտպան Ռուբեն Մելիքյանը սեպտեմբերի 1-ին հայտարարել էր դպրոցական շարադրությունների մրցույթ՝ «Ինչու են մարդու իրավունքները կարևոր» խորագրով։ Պաշտպանը նաև նշել էր, որ մրցույթի մանրամասները կհրապարակվեն ավելի ուշ։ 
   Ստորև ներկայացվում է Մարդու իրավունքների պաշտպանի հայտարարած մրցույթի անցկացման կարգը, ինչպես նաև մրցութայինհանձնաժողովի կազմը։ 
   Շարադրությունների առավելագույն ծավալ է սահմանվել 1200 բառը, իսկ դրանց ներկայացման վերջնաժամկետն է նոյեմբերի 3-ը։ Ընդ որում, աշխատանքները կարող են ուղարկվել ինչպես թղթային, այնպես էլ էլեկտրոնային եղանակով։ 
   Մրցութային հանձնաժողովի կազմում ընդգրկվել են հանրային գործիչներ Արցախից, Հայաստանից և Սփյուռքից։ Սահմանվել են աշխատանքների գնահատման հստակ չափորոշիչներ։ 
   Մրցույթի գործընկերն է հայկական Technology and Science Dynamics Inc. ընկերությունը, որը մրցանակային տեղեր զբաղեցրած մասնակիցներին կտրամադրի իր կողմից արտադրվող ArmPhone բջջայիններ և ArmTab պլանշետներ։ Բացի այդ, Արցախ կատարած աշխատանքային այցի ընթացքում ՀՀ մարդու իրավունքների պաշտպան Արման Թաթոյանը հայտարարել է հատուկ մրցանակ՝ առավել ինքնատիպ աշխատանքի համար։ Կարող են հայտարարվել այլ հատուկ մրցանակներ ևս։ 
   Մրցույթի արդյունքները կամփոփվեն 2016թ. դեկտեմբերի 10-ին՝ Մարդու իրավունքների միջազգային օրը։ 

Արցախի մարդու իրավունքների պաշտպանի աշխատակազմ
   01.09.2016

ԼՂՀ օմբուդսմենը հայտարարել է դպրոցական շարադրությունների մրցույթ

   Սեպտեմբերի 1-ին` գիտելիքի և դպրության օրը, Արցախի մարդու իրավունքների պաշտպան Ռուբեն Մելիքյանը այցելել է Շուշիի Խ.Աբովյանի անվան միջնակարգ հոսքային դպրոց և ավագ դասարանների աշակերտների համար անցկացրել է բաց դաս` <<Արցախի անկախության 25-ամյակը և մարդու հիմնարար իրավունքները>> թեմայով: 

   Շնորհավորելով տոների առթիվ` Պաշտպանը կարևորել է գիտելիքներ ստանալու մոտիվացիան և կոչ արել ձեռքբերածով երբեք չբավարարվել: Պաշտպանն ընդգծել է, որ Արցախի քաղաքացիների նոր սերունդը պետք է միշտ հիշի այն զրկանքները, որոնց գիտակցաբար գնացել է 25 տարի առաջ Անկախությունը հռչակած և պաշտպանած ավագ սերունդը, և որ եկել է նոր սերնդի հերթը սեփական աշխատանքով ամրապնդելու հայրենի պետականությունը: Այնուհետև Ռ.Մելիքյանը խոսել է մարդու հիմնական իրավունքների և ազատությունների, Արցախում դրանց պաշտպանվածության վիճակի, առկա խնդիրների և դրանց լուծման ուղղությամբ Պաշտպանի գործունեության մասին: Պաշտպանը նշել է, որ մարդու իրավունքները արդյունավետ պաշտպանելու համար, նախ, պետք է գիտակցել դրանց կարևորությունը` որպես պետականակերտ գործոն, իսկ որպես իրավունքի ոլորտում հանրային գիտակցության իր պատկերացրած ուղենիշ` համարել է այն վիճակը, երբ յուրաքանչյուր քաղաքացու համար մյուս քաղաքացիների իրավունքների նկատմամբ հարգանքը նույնքան կարևոր է, որքան սեփական իրավունքների նկատմամբ հարգանքը: Պաշտպանը ներկաներին կոչ է արել մտածել այդ ուղղությամբ և հետևություններ կատարել: 

   Հանդիպման ավարտին Ռ.Մելիքյանը հայտարարել է դպրոցական շարադրությունների մրցույթ` «Ինչու՞ են մարդու իրավունքները կարևոր» խորագրով, որին կարող են մասնակցել Արցախի միջնակարգ դպրոցների ավագ դասարանների և ավագ դպրոցների բոլոր աշակերտները: Մրցույթի արդյունքներն ամփոփվելու են 2016թ. դեկտեմբերի 10-ին` Մարդու իրավունքների միջազգային օրը: Շարադրությունները կգնահատվեն մրցութային հանձնաժողովի կողմից, որի կազմում ընդգրկվելու են Արցախի, Հայաստանի և Սփյուռքի հանրային գործիչներ, իսկ հանձնաժողովը նախագահելու է Արցախի մարդու իրավունքների առաջին պաշտպան Յու.Հայրապետյանը: Օմբուդսմենը հավելել է, որ շարադրությունները գնահատելիս կարևորվելու են մարդու իրավունքների վերաբերյալ գիտելիքները, ստեղծագործական մոտեցումը, շարադրանքի անմիջականությունն ու տրամաբանականությունը, ինչպես նաև աշխատանքի ինքնուրույնությունը, իսկ լավագույն շարադրությունների համար սահմանվելու են արժեքավոր մրցանակներ: Աշխատանքները կարող են էլեկտրոնային կամ թղթային ձևով ներկայացվել ԼՂՀ ՄԻՊ աշխատակազմ` մինչև նոյեմբերի 1-ը, իսկ մրցույթի անցկացման մյուս պայմանները կհրապարակվեն լրացուցիչ:

 

 ԼՂՀ մարդու իրավունքների պաշտպանի աշխատակազմ

01.09.2016թ 

   29.08.2016

   2016թ. հունիսի 6-ին Ստեփանակերտում ԼՂՀ ազգային ժողովի պատգամավոր Հայկ Խանումյանին բռնության ենթարկելու փաստը հասկանալիորեն ստացել է հանրային լայն արձագանք, իսկ փաստի առթիվ հարուցված քրեական գործով վարույթը դարձել է հանրային ուշադրության առարկա։ 
   Արցախի մարդու իրավունքների պաշտպանը բռնության գործադրման օրը հանդես է եկել հայտարարությամբ, որով դատապարտել է բռնարարքը, ինչպես նաև ընդգծել է քննության արդյունքների մասին հանրությանը պատշաճորեն իրազեկելու անհրաժեշտությունը: Նույն հայտարարությամբ օմբուդսմենը նաև հանձնառություն է ստանձնել հետևելու փաստի վերաբերյալ քննության ընթացքին: 
   Գործով նախաքննության ընթացքում օմբուդսմենի աշխատակազմն առանձին վարութային հարցերի շուրջ դիմումներ է ստացել տուժողի ներկայացուցչից և մեղադրյալների պաշտպանից, որոնք որոշմամբ ընդունվել են քննարկման: 
   Մարդու իրավունքների պաշտպանն արձանագրում է, որ քննության հատկապես սկզբնական փուլում հանրությանն իրազեկելու գործառույթը հիմնականում իրականացվել է պատշաճ մակարդակով, մասնավորապես` պարբերաբար հաղորդագրություններ են տրվել` հայտնելով արարքի սկզբնական որակումը (առևանգում), բացահայտելով կատարվող դատավարական գործողությունների և օպերատիվ-հետախուզական միջոցառումների շրջանակը, այնուհետև` տեղեկացնելով ենթադրաբար հանցանք կատարած անձանց նկատմամբ քրեական հետապնդում հարուցելու և դատավարական հարկադրանքի միջոցներ (ձերբակալում, կալանավորում) կիրառելու մասին: 
   Մարդու իրավունքների պաշտպանը արձանագրում է նաև, որ ներկայում հանրային ուշադրության առարկա է դարձել, մասնավորապես, մեղադրյալների արարքները առևանգումից (ծանր հանցագործություն) խուլիգանության (միջին ծանրության հանցագործություն) վերաորակելու փաստը: Իսկ նշված որոշման դեմ տուժողի ներկայացուցչի բողոքը դատախազական հսկողություն իրականացնող մարմնի կողմից մերժվել է: Հանրային ուշադրությունը պայմանավորված է նաև այն հանգամանքով, որ առկա է ԼՂՀ հռչակման 25-րդ տարեդարձի կապակցությամբ հայտարարված համաներումը մեղադրյալների նկատմամբ կիրառելու հնարավորություն: 
   Վերոգրյալը հաշվի առնելով` մարդու իրավունքների պաշտպանն անհրաժեշտ է համարում, որ դատախազությունը հանրությանը պարզաբանի վերաորակման փաստական և իրավական հիմնավորումը: Ընդ որում, ցանկալի է, որ պարզաբանումը մատչելի լինի ոչ միայն իրավաբանների, այլև լայն հանրության համար: 
   Իրավական գործընթացի հանգուցալուծումից հետո մարդու իրավունքների պաշտպանը հանդես կգա ամփոփիչ հայտարարությամբ: 

Արցախի Հանրապետության մարդու իրավունքների պաշտպանի աշխատակազմ
   01.08.2016

Արցախի Հանրապետության մարդու իրավունքների պաշտպանի հերթական հանդիպումը քաղաքացիական հասարակության ներկայացուցիչների հետ

   Արցախի քաղաքացիական հասարակության հետ հունիսի 7-ին տեղի ունեցած ճանաչողական հանդիպման ընթացքում ԼՂՀ օմբուդսմեն Ռուբեն Մելիքյանը ստանձնել էր պարբերաբար հանդիպումներ հրավիրելու հանձնառություն։ Ի կատարումն այդ հանձնառության՝ օգոստոսի 1-ին Շուշիում հրավիրվել է քաղաքացիական հասարակության ներկայացուցիչների հետ հերթական հանդիպումը: Հանդիպման սկզբում Ռ.Մելիքյանը տեղեկացրեց, որ քաղաքացիական հասարակության հետ աշխատանքը համակարգված ու արդյունավետ դարձնելու նպատակով ԼՂՀ մարդու իրավունքների պաշտպանի աշխատակազմը նույն օրվանից համալրվում է նոր աշխատակցով, ում վրա դրվում է քաղաքացիական հասարակության հետ կապերի պատասխանատուի պարտականություն: 
   Այնուհետև Պաշտպանը նշել է, որ տվյալ ձևաչափով հանդիպումների ընթացքում այսուհետ ներկայացնելու է հրապարակային հաղորդում նախորդ հանդիպումից հետո կատարված աշխատանքի մասին՝ առանձին հարցերի շուրջ խորհրդակցելով հանդիպման մասնակիցների հետ։ Ներկայացնելով հունիս-հուլիս ամիսներին կատարած աշխատանքը՝ Ռ.Մելիքյանը մասնավորապես անդրադարձել է հունիսի վերջին Բելգիա կատարած աշխատանքային այցի արդյունքներին, Ադրբեջանի ապրիլյան ագրեսիայի հետևանքների փաստագրման ու դրանց վերաբերյալ իրազեկման ուղղությամբ կատարող աշխատանքին, ԼՂՀ քրեակատարողական համակարգում մարդու իրավունքների պաշտպանության մակարդակի բարձրացման ուղղությամբ ձեռնարկվող քայլերին։ Պաշտպանը նաև հայտնել է, որ նամակով դիմել է ՀՀ մարդու իրավունքների պաշտպան Արման Թաթոյանին հուլիսի 29-ին Երևանում ընթացող հավաքը լուսաբանելիս հարձակման ենթարկված լրագրող, ԼՂՀ քաղաքացի Մ.Վանյանին աջակցություն ցուցաբերելու, քրեական վարույթի ընթացքին հետևելու ու այդ մասին իրեն տեղեկացնելու խնդրանքով։ 
   Հանդիպման ընթացքում Ռ.Մելիքյանը հատուկ ընդգծել է, որ առկա է մարդու իրավունքների պաշպանի ինստիտուտն ավելի գործառնական ու քաղաքացիների համար ավելի մատչելի դարձնելու խնդիր և նշել է, որ այդ հարցերում ակնկալում է քաղաքացիական հասարակության աջակցությունը։ 
   Պաշտպանի հաղորդումից հետո մասնակիցներին հնարավորություն է տրվել ուղղել հարցեր և ներկայացնել առաջարկություններ։ Մասնավորապես, «Ժողովրդական դիվանագիտական ինստիտուտ» ՀԿ նախագահ Իրինա Գրիգորյանը օմբուդսմենի ուշադրությունը հրավիրեց այն հանգամանքին, որ ԼՂՀ-ն ստանձնել է ≪Քաղաքացիական և քաղաքական իրավունքների միջազգային դաշնագրով≫ ամրագրված պարտավորությունները, և ցանկալի կլինի, որ, օրինակ, Մարդու իրավունքների պաշտպանի կողմից կազմվի դաշնագրով նախատեսված զեկույց՝ ԼՂՀ-ում այդ կարևորագույն փաստաթղթով ամրագրված հիմնարար իրավունքների վիճակի, առկա դրական փորձի ու խնդիրների մասին։ Ռ.Մելիքյանը ողջունեց առաջարկը և խոստացավ քննարկել այն։ 
   Հանդիպման վերջում Ռ.Մելիքյանը վերահաստատել է իր սկզբունքային մոտեցումը՝ ավելի խորացնելու համագործակցությունը Արցախի քաղաքացիական հասարակության հետ։ 
   Արցախի ՄԻՊ աշխատակազմ
   22.07.2016

Հայտարարություն

   Հիմք ընդունելով Արցախի քաղաքացիական հասարակության ներկայացուցիչների հետ ճանաչողական հանդիպման ընթացքում ձեռքբերված պայմանավորվածությունը` ԼՂՀ մարդու իրավունքների պաշտպանը Արցախի քաղաքացիական հասարակության ներկայացուցիչներին հրավիրում է հերթական հանդիպման: Հանդիպման ընթացքում Ռուբեն Մելիքյանը կներկայացնի վերջերս Բրյուսել կատարած աշխատանքային այցի արդյունքները, ինչպես նաև քննարկման կներկայացնի օմբուդսմենի ինստիտուտի և քաղաքացիական հասարակության միջև փոխգործակցության ամրապնդման ուղղությամբ իր նախաձեռնությունները: 
   Հանդիպումը տեղի կունենա օգոստոսի 1-ին՝ ժամը 11-ին, ԼՂՀ մարդու իրավունքների պաշտպանի աշխատակազմի վարչական շենքում (ք. Շուշի, Հախումյան 28 հասցեով): 

   Հանդիպմանը մասնակցելու համար անհրաժեշտ է մինչև հուլիսի 29-ը ombudsmannkr@gmail.com էլ.հասցեին ուղարկել մասնակցության հայտ կամ զանգահարել 047-73-90-46 հեռախոսահամարով։ 
   Արցախի Հանրապետության մարդու իրավունքների պաշտպանի աշխատակազմ
   08.07.2016

Հայտարարություն

   Արցախի Հանրապետության մարդու իրավունքների պաշտպանի աշխատակազմը տեղեկացնում է, որ ԼՂՀ քաղաքացիներին խորհրդատվություն տրամադրելու նպատակով հրավիրվել են ֆինանսական (բանկային և ապահովագրական) որոլտում սպառողների իրավունքների պաշտպանության հարցերով անկախ մասնագետներ, որոնց մասնակցությամբ կիրականացվի քաղաքացիների ընդունելություն: 
   Ընդունելությունը կիրականացվի սույն թվականի հուլիսի 18-ին և 19-ին ԼՂՀ մարդու իրավունքների պաշտպանի աշխատակազմում՝ ք.Շուշի, Հախումյան 28 հասցեով: 
   Ընդունելությանը գրանցվելու և մանրամասն տեղեկությունների համար զանգահարել 047-73-90-46 և 047-73-90-48 հեռախոսահամարներով:
   01.07.2016

Թալիշում բերքահավաք իրականացնող խաղաղ բնակչության ուղղությամբ ադրբեջանական ԶՈւ կողմից կրակահերթ արձակելու վերաբերյալ

   2016թ. հունիսի 30-ին ԼՂՀ Մարտակերտի շրջանի Թալիշ համայնքի ղեկավար Վիլեն Պետրոսյանը Արցախի մարդու իրավուքների պաշտպանի աշխատակազմին դիմում է ներկայացրել այն մասին, որ համայնքի գյուղատնտեսական նշանակության տարածքներում ադրբեջանական զինված ուժերը հրաձգային զինատեսակներից անկանոն կրակ են բացել հացահատկի բերքահավաք իրականացնող խաղաղ բնակչության ուղղությամբ։ Համայնքի ղեկավարը տեղեկացրել է նաև, որ անվտանգության նկատառումներով բերքահավաք աշխատանքները դադարեցվել են: 
   Մարդու իրավունքների պաշտպանը խստորեն դատապարտում է Թալիշ համայնքի բնակիչների կյանքի իրավունքի և սեփականության իրավունքի նկատմամբ Ադրբեջանի զինված ուժերի ոտնձգությունը և միջազգային հումանիտար իրավունքի պահանջների ոտնահարումը։ Մարդու իրավունքների պաշտպանության առաքելություն իրականացնող և հատկապես Ադրբեջանում գործունեություն ծավալող իրավասու միջազգային կազմակերպություններին պաշտպանը կոչ է անում գործուն միջոցներ ձեռնարկել նման դեպքերը բացառելու ուղղությամբ։ 
   Միաժամանակ, Մարդու իրավունքների պաշտպանի հանձնարարությամբ, «Մարդու իրավունքների պաշտպանի մասին» ԼՂՀ օրենքով սահմանված կարգով, պաշտպանի աշխատակազմն իրականացնում է միջադեպի հանգամանքների փաստագրում և իրավական վերլուծություն, որոնց արդյունքները հասանելի կդարձվեն հանրությանը։
Արցախի օմբուդսմենի աշխատակազմ
Նախորդ|Հաջորդ
1234





Copyright © www.ombudsnkr.am 2011-2018
Website developed by CompService Ltd.